富士山登山

新開BLOG 冇咩文章,出返D 舊POST 先. 上富士山係我2011年9月既.

今次東京之行最後兩日特別安排左上富士山攻頂,原本係想令成個只有食和shopping既行程變得不平凡.但點知原來中哂伏....

9月8日 神早9:40 就坐富士急行去富士山五合目.呢度簡介一下,富士山分為十層,由一合目到十合目,十合目就係山頂.登山路線總共有五條.但大多數人都會選擇坐車到五合目為起點上山.

大約11:45 就到左吉田口五合目. 

出發!!
五合目至六合目係俾你用作熱身....係呢個高度都頂唔住就唔好想上山頂啦.
難度係0,應該斜度唔大,溫度正常.只係呼吸會比平地辛苦,好快會適應.但我個肥仔朋友就行到嘴唇都白埋,行幾分鐘就要休息....
一路上都有人原路折返.有一個小朋友,應該都唔夠十歲,佢同爸爸一齊黎上山.勁!

睇下下面幅圖,其實已經過左六合目,上緊七合目.

最大特色係冇平地你行了,要手腳並用去爬石,唔好以為個d 係樓梯,其實只係一堆大石堆砌而成. (記住戴勞工手套~)

終於去到七合目啦,第一個旅舍叫花小屋,為左方便登山人士,所有山小屋都建在七合目和八合目.過一晚夜連晚餐大約8000yen.

去到七合目已經係2700M.

 下圖所見,係七合目至八合目既特色.手腳並爬近乎垂直既岩石.

上到東陽館發現肥仔fd唔見左,坐係度吹風吹左成個鐘等佢,結果都等唔到,只好自己一個繼續上山.

佢有兩個可能,一係投宿,一係放棄了回新宿.後尾好到佢email 原來返左hotel...
由於等佢所以擔吾左時間,個時差唔多下午4點幾,要快d 上八合目搵地方投宿,因為就來入黑.
差唔多5點30分,終於捱到八合目的蓬萊館.實在冇力再行上去,加上就天黑,我帶既衫唔夠應付零度左右既溫度.所以決定係度過一晚夜.

唔好以為哩d山小屋係酒店,係睡覺的空間只有一個睡袋的位置.

一張床一字排開訓十幾個人,睇下面張圖就知....
晚餐係一兜即食既咖哩飯,即係超市買到就咁整熱佢個D. 對於我帶得幾條SNACKERS 上去既傻仔黎講,係非常重要既一餐...

訓到清晨5點,館主突然叫醒我,原來叫我地起等日出.係雲層上面睇真的好靚呀.香港無可能睇到

睇完日出差唔多5:20.要繼續上山,館主俾左份早餐+一支水我就起行了. 我唔知包埋早餐,早知食埋先走...

但一上山就覺得唔對路.3200m 既高空係另一個層次.含氧量只有地面既2/3.當時氣溫只有0度左右,加上10號風球既大風.
令我這個7合目仲健步如飛既人,行二十幾步就要停低等心跳減漫.

好辛苦捱到八合五勺(即8.5合目)個人已經處於失溫的狀態. 加上8合目以上係紅土+碎石,好容易就會滑到,滑到加上強風就有機會吹你落山咁你就死硬,因為山路沒有攔杆/扶手.所以自己每步都要好小心.

八合五勺之後就到九合目,雖然知道山頂在望,但哩條路係我最辛苦既,3600m高空.心跳已經快到就要爆,0 度既氣溫,比八合目更大既強風.我每行5步就要停一停,唔係跟本連空氣呼吸唔到.八合五勺至九合目係最容易讓人迷失,繼而放棄求生意志既地方.因為太辛 苦,再上身體可能因為唔夠氧而死,行返轉頭又要好幾小時,我落山時識左個日本人,佢係大學教師,佢話我知原來每年都好多人死係山上,其實我一路上山,想過 無限次放棄,但最終係靠意志力捱過去.

九合目到山頂冇咩特別,只有辛苦.上到山頂原來吹緊沙塵步,眼,口都係沙

影張相就快快落山了.

落山係無盡的"之"字形山路. 由於我唔係著行山鞋,不斷的滑到.做左十幾次一字馬....好彩有勞工手套,唔係隻手一定流哂血.

落山返五合目用左3個半小時.去到五合目小便時隻腳不斷震,冇辦法停...